काठमाडौं / नेपाली साहित्यका महान् प्रतिभा भैरव अर्यालको स्मृतिमा स्थापित विभिन्न तीन पुरस्कारका विजेताहरूको नाम भैरव पुरस्कार गुठीले सार्वजनिक गरेको छ।
गुठीका अध्यक्ष तथा वरिष्ठ साहित्यकार रोचक घिमिरेको अध्यक्षतामा सम्पन्न बैठकले २०८२ सालका लागि प्रदान गरिने पुरस्कारहरूका लागि स्रष्टाहरूको नाम अनुमोदन गरेको हो।
गुठीका अनुसार, यस वर्षको ‘भैरव पुरस्कार’ भारतको सिलगुढी निवासी वरिष्ठ हास्यव्यङ्ग्यकार कृष्ण प्रधानलाई प्रदान गरिने भएको छ। नेपाली हास्यव्यङ्ग्य साहित्यमा निरन्तर योगदान दिँदै आउनुभएका प्रधानलाई यसपटक नेपालबाहिरबाट सम्मानित गरिने पहिलो स्रष्टाका रूपमा चयन गरिएको हो। पुरस्कार राशी रु १,११,१११ (एक लाख एघार हजार एक सय एघार रुपैयाँ) रहेको छ।
त्यसैगरी, ‘भैरव वाङ्मय पुरस्कार’ वरिष्ठ चित्रकलाकार हरिप्रसाद शर्मालाई प्रदान गरिनेछ। साहित्यिक चेतनासँग सम्बन्धित चित्रकला र सृजनात्मक अभिव्यक्तिमा पुर्याउनुभएको योगदानका आधारमा उहाँलाई सम्मान गर्न लागिएको हो। सो पुरस्कारको राशी रु १,०१,१११ (एक लाख एक हजार एक सय एघार रुपैयाँ) छ।
यसै क्रममा, ‘भैरव प्रतिभा पुरस्कार’ विराटनगर निवासी साहित्यकार विवश पोखरेललाई प्रदान गरिनेछ। पोखरेलले नेपाली साहित्यमा निरन्तर साधना गर्दै आएका छन्। यस पुरस्कारको राशी रु ५१,१११ (एकाउन्न हजार एक सय एघार रुपैयाँ) तोकिएको छ।
पुरस्कार विजेताहरूको छनोटका लागि गुठीले साहित्यकार वसन्त रिजालको संयोजकत्वमा साहित्यकारद्वय नरेन्द्रराज पौडेल र प्रल्हाद पोखरेल सदस्य रहेको चयन समिति गठन गरेको थियो। समितिले प्राप्त सिफारिसको आधारमा योग्य स्रष्टाहरूको नाम गुठीसमक्ष पेस गरेको थियो।
उक्त पुरस्कारहरू आगामी असोज ३ गते, गणतन्त्र दिवसको अवसरमा, काठमाडौंको गोकर्णेश्वर–५ स्थित भैरव स्मृति भवनमा आयोजित विशेष समारोहमार्फत वितरण गरिने गुठीले जनाएको छ।
भैरव पुरस्कारका लागि छनोट भएका कृष्ण प्रधान हाल विजयपुर अनलाइनका अतिथि सम्पादकका रूपमा कार्यरत हुनुहुन्छ।
